ماں بولی دیہاڑ …………………… از قلم تنویر بیتاب

اج سارے جہان وچ ماں بولی دا دیہاڑ منایا جاوے گا۔لوکی آپنی آپنی ماں بولی نال پیار وکھان گے۔ماں بولی نوں پچھے سُٹن آلےآپ وی پچھے ای رہندے نئیں۔اسیں پنجابی او لوک آں جناں آپنی ماں بولی نوں آپ آپنے گھراں وچوں باہر کڈھ دتا اے۔اج ساڈے نیانے پنجابی توں اڈھ ہر بولی بولدے نئیں۔اُردو ، اے ساڈی قومی زبان اے جی ، انگریزی ایہہ پڑھائ کرن لئ تے دوجے مُلک جان لئ بولنی سکھ لیندے نئیں۔اس تو اڈھ ہور بولیاں چا چا وچ ای سکھ لینے نئیں ۔ جے کر نئیں آندی تے آپنی ماں بولی پنجابی بولنی نئیں آندی۔

اے کڈی بھیڑی گل اے کہ اسیں آپ ای آپنی ماں بولی وچ گل بات کرنا چنگا نئیں جان دے۔لوکی کیندے نئیں پنجابی بولن نال بندہ ان پڑھ ان پڑھ جیا لگدا اے۔کسے وی بولی دا پڑھے ہون یاں نہ ہون نال کوئ تعلق نئیں ہندا۔جے کر اسیں آپ آپنی ماں بولی نوں عزت ناں دیاں گے تے فیر دوجے لوک کیوں دین گے؟ آپنی ماں بولی نوں اساں آپ جیوندا رکھنا ا تے ایدھے لئ ضروری اے کے اسیں آپنے گھراں وچ آپنے نیانیاں نال پنجابی وچ گل بات کرئیے۔جے کر نیانیاں نوں ماں بولی سمجھ نئیں آندی تے اُناں نو سکھائیے۔جے کر سارا دیہاڑ نئیں تے دیہاڑ دا کُج ویلا تے انج دا رکھو جدوں گھر وچ گھر دے سارے جی اک دوجے نال پنجابی بولی وچ گل بات کریا کرو۔

چلو من لیندے آں سرکاری ملازماں دی تے اے مجبوری ہو سکدی اے کے او دفتراں وچ سرکاری بولی اُردو وچ گل بات کرن پر اپنا کم کار کرن والیاں نوں تے چائ دا اے کے او آپنے کم دے تھاں تے وی پنجابی وچ گل بات کریا کرن۔

اک گل چیتے رکھو ماں بولی دے دیہاڑ تے جلسے تے جلوس کرن نال کُجھ نئیں جے ہونا۔آپی ماں بولی نوں جیوندا رکھن لئ سانوں وی آپنے سکھ بھراواں وانگر آپنے نیانیاں نو پنجابی سکھانی پینی اے۔پنجابی دے گیت، ڈرامے، فلماں وی ایس بولی نوں اگے ودھا سکدیاں نئیں۔

اج ماں بولی دے دیہاڑ توں تُسیں آپنے آپنے گھر وچ تے آنڈیاں گوانڈیاں نال پنجابی زبان وچ گل بات کرنی شروع کرکے آپنی ماں بولی نال پیار وکھا دیو۔

اس خبر پر اپنی رائے کا اظہار کریں

اپنا تبصرہ بھیجیں